Get Adobe Flash player

انقلابی پالیسیوں کے ذریعے استحصالی نظام کا خاتمہ ممکن ہے

پاکستان کی سیاست میں انقلاب کی اصطلاح کو تواتر اور شدت کے ساتھ استعمال کیاگیا مروجہ معانوں میں انقلاب استحصالی اور استعماری نظام کے خاتمے کا نام ہے بعض حلقوں کا یہ تاثر درست نہیں کہ جمہوری نظام کے ذریعے انقلاب نہیں لایاجاسکتا اور اس کے لئے روایتی جمہوریت سے ہٹ کربعض اقدامات کی ضرورت ہوتی ہے جبکہ حقیقت یہ ہے کہ یہ حکمرانوں کی نیت پر منحصر ہے اگر کوئی منتخب حکومت ملک سے استحصالی نظام کے خاتمے کی خواہاں ہے اور طبقاتی کشمکش اور امتیاز کو مٹانے اور مراعات یافتہ طبقات اشرافیہ کے کردار کو محدود کرنے کی خواہش رکھتی ہے تو اس کے راستے میں کوئی بھی رکاوٹ حائل نہیں ہوسکتی لیکن اگر اس کے برعکس کوئی جمہوری حکومت ایوانوں میں موجود جاگیرداروں اور سرمایہ داروں کے مفادات کو تحفظ فراہم کرنے کے لئے پالیسیاں وضع کرتی ہے اور عوام کو محض معمولی سبسڈی اور ریلیف کے ذریعے مطمئن کرنے کی کوشش کرتی ہے تو اس کے اس کردار کو یقیناً عوام کے مینڈیٹ سے بیوفائی کے علاوہ اور کوئی نام نہیں دیاجاسکتا عوام ووٹ اور مینڈیٹ کے ذریعے درحقیقت حکومت کو انقلاب یعنی استحصالی نظام کو تبدیل کرنے اور قومی خواہشات کے مطابق پالیسیاں وضع کرنے کا اختیار دیتے ہیں اگر منتخب حکومت اس اختیار کو اکثریتی عوام کے بجائے مخصوص طبقات کے مفادات کو محفوظ بنانے کے لئے استعمال کرتی ہے تو یہ جمہوری رویوں کی سراسر نفی ہے جمہوری رویے جمہور کے ساتھ سماجی ومعاشی انصاف کا تقاضا کرتے ہیں کسی اقلیتی گروپ کے مفادات کو تحفظ فراہم کرنے کی ہرگز اجازت نہیں دیتے وزیراعظم محمد نوازشریف نے گزشتہ روز اسلام آباد میںقرضہ حسنہ اسکیم کا افتتاح کرتے ہوئے واضح طور پر کہا کہ پاکستان کا مستقبل جمہوریت اور آئین سے وابستہ ہے جس کا تحفظ عوام کریں گے ان کا کہناتھا کہ ہمارے دور میں ہی پاکستان کی قسمت بدلے گی کھوکھلے نعروں والے پھر مستردہوں گے انقلاب صرف الیکشن سے ہی آئے گا انہوں نے بجا طور پر اس حقیقت کی نشاندہی کی ہے جسے انقلاب کے تناظر میں بے حد اہمیت حاصل ہے یہ بھی واضح رہے کہ عام طور پر انقلاب خانہ جنگی اور خونریزی کے بطن سے پیدا ہوتے ہیں سسٹم کی تبدیلی کے لئے تحریکیں چلتی ہیں لاتعداد لوگ ان میں ریاستی تشدد کا نشانہ بنتے ہیں اس کے بعد ہی سسٹم کی تبدیلی کی توقع کی جاسکتی ہے مگر جمہوری نظام کی خصوصیت یہ ہے کہ اس میں عوام کے ووٹوں کے ذریعے ہی پرامن انقلاب کے امکانات روشن ہوتے ہیں ان امکانات کو یقینی بنانا منتخب حکومت کی پالیسیوں پر منحصر ہے کہ ان کا رخ کس طرف ہے عوام یا مخصوص طبقات کے مفادات کی جانب بلاشبہ وزیراعظم نوازشریف کی حکومت ملک کو دہشت گردی سے پاک کرنے مملکت کی معاشی بنیادوں کو مضبوط بنانے اور جمہوری اقدار کے استحکام کے لئے اہم کردار ادا کر رہی ہے اور اس نے ایک سال کے مختصر عرصے میں حیران کن کامیابیاں حاصل کی ہیں عالمی سطح پر بھی اس کی ان کامیابیوں کا اعتراف کیا جارہاہے لیکن اس کے باوجود ہم حکومتی اقدامات کو انقلابی اقدامات سے تعبیر نہیں کرسکتے اس لئے کہ حکومتی پالیسیوں کے ذریعے سسٹم میں کسی تبدیلی کے آثار نہیں دکھائی دیتے یہ جاگیرداروں سرمایہ داروں اور مراعات یافتہ طبقات کے مفادات کو تحفظ فراہم کر رہی ہیں جب تک مراعات اور مفادات کا رخ عوام کی جانب نہیں موڑ دیاجاتا اور طاقت کے روایتی مراکز یعنی جاگیرداری سرمایہ داری اور مراعات یافتہ طبقات کو کمزور نہیں کیاجاتا اس وقت تک معاشرے میں کسی انقلابی تبدیلی کی توقع نہیں کی جاسکتی وزیراعظم نوازشریف جنھیں تیسری بار وزارت عظمےٰ کا منصب ملا ہے ان کی یہ اولین ذمے داری ہے کہ وہ روایتی طریقے سے حکومت چلائیں نہ ان روایتی پالیسیوں کا سہارا لیں جن سے عوام ہمیشہ نالاں رہے ہیں انہیں انقلابی اندازفکر کے ساتھ کام کرنا ہوگا قومی اسمبلی میں انہیں جو غیر معمولی اہمیت حاصل ہے اس کے ذریعے وہ روایتی نظام کو تبدیل کر کے اس میں انقلابی روح پیدا کر سکتے ہیں تاہم اس کے لئے انہیں جاگیرداروں اور سرمایہ کاروں کی پشت پناہی چھوڑ کر عوام کے ساتھ مکمل وابستگی اختیار کرنی ہوگی ان کی پالیسیاں اور کارکردگی جمہوری نظام اور اس کی ساکھ کو مضبوط کرنے کا باعث بھی بن سکتی ہیں اور عوام کو ہمیشہ ہمیشہ کے لئے جمہوری سسٹم سے بے زار بھی کرسکتی ہیں اب یہ ان کی حکومت پر منحصر ہے کہ وہ کس انداز سے پیش رفت کرتی ہے اور اس کی پالیسیاں کس سمت آگے بڑھتی ہیں۔