Get Adobe Flash player

بھارتی وزیر خارجہ کا مثبت انداز فکر اور خارجہ سیکرٹریوں کی مجوزہ ملاقات

نئی دہلی سے یہ خوش کن اطلاع سامنے آتی ہے کہ طویل تعطل کے بعد اگست میں پاکستان اور بھارت کے خارجہ سیکرٹریوں کی ملاقات طے پائی ہے چنانچہ پاکستان کے سیکرٹری خارجہ سے مذاکرات کیلئے بھارت کی سیکرٹری خارجہ سجاتا سنگھ اگست کے پہلے ہفتے میں پاکستان آئیں گی یہ امر قابل ذکر ہے کہ چند روز قبل بھارت کی خارجہ سیکرٹری سجاتا سنگھ نے وزیر خارجہ سشما سوراج سے ملاقات کی تھی اس ملاقات کے دوران جنوبی ایشیاء کے امور پر بات چیت کی گئی خصوصاً پاک بھارت خارجہ سیکرٹریوں کی سطح پر بات چیت کو آگے بڑھانے کے مختلف پہلوئوں کا جائزہ لیا گیا جس کے بعد یہ طے پایا کہ اگست کے پہلے ہفتے میں بھارت کی سیکرٹری  خارجہ سجاتا سنگھ اعلیٰ سطح کے ایک وفد کے ہمراہ اسلام آباد آئیں گی جہاں وہ اپنے پاکستانی ہم منصب سے مذاکرات کریں گی پاک بھارت خارجہ سیکرٹریوں کی مجوزہ ملاقات کے حوالے سے اس امر کا ذکر ضروری ہے کہ نریندر مودی کی حلف برداری کی تقریب میں شرکت کے موقع پر دونوں ملکوں کے وزرائے اعظم کے درمیان یہ طے پایا تھا کہ جامع مذاکرات کی بحالی کے معاملہ کا جائزہ لینے کیلئے پہلے مرحلے میں دونوں ملکوں کے خارجہ سیکرٹری مذاکرات کریں گے ادھر ڈھاکہ میں میڈیا سے بات چیت کرتے ہوئے بھارتی وزیر خارجہ سشما سوراج نے اگرچہ پاکستان کے ساتھ تعلقات کے نئے دور کے آغاز کی خواہش ظاہر کی ہے تاہم یہ کہا ہے کہ مذاکرات کا بگل اور دھماکوں کی آواز ایک ساتھ نہیں چل سکتے بات چیت کیلئے پر امن ماحول اور سازگار  فضا لازمی ہے انہوں نے کہا کہ بھارت پاکستان اور بنگلہ دیش سمیت تمام پڑوسی ممالک کے ساتھ اچھے تعلقات چاہتا ہے بھارت کی نئی حکومت خطے میں نئی اور مثبت تبدیلی کیلئے پر امید ہے انہوں نے کہا کہ بھارت پاکستان اور بنگلہ دیش دونوں سے تعلقات کا نیا دور شروع کرنے کا خواہاں ہے جس میں امن کیلئے کوشش کی جاسکتی ہیں تاہم مذاکرات اور تشدد ایک ساتھ نہیں چل سکتے ان کا کہنا تھا کہ تشدد آمیز ماحول میں مذاکرات نہیں ہوسکتے انہوں نے کہا کہ دنیا میں کوئی مسئلہ ایسا نہیں جس کا حل ممکن نہیں لیکن ضرورت اس امر کی ہے کہ امن کے ماحول میں مذاکرات ہوں اور مسائل کو ایک ایک کرکے حل کرنے کی کوشش کی جائے بھارت مسائل کو حل کرنے میں سنجیدہ ہے اسی باعث وہ پڑوسی ممالک سے امن مذاکرات کو جاری رکھنے کی کوشش کررہا ہے اس ضمن میں پڑوسی ممالک کی جانب سے بھی مثبت ردعمل لازمی ہے انہوں نے کہا کہ بی جے پی کی حکومت نہ صرف خطے میں امن کی خواہاں ہے بلکہ ہم سارک ممالک میں بھی امن کے حامی اور تشدد کے خلاف ہیں۔بھارتی وزیر خارجہ کا انداز گفتگو اور لب و لہجہ نئی بھارتی حکومت کے مثبت احساسات کو ظاہر کرتا ہے ان کا یہ طرز فکر بلا شبہ حقیقت پسندانہ ہے کہ مسائل کو ایک کر کے حل کیا جاسکتا ہے اور دنیا میں کچھ بھی ناممکن نہیں ہے ہم ان کے اس موقف کی بھی حمایت کرتے ہیں کہ مذاکرات اور تشدد کبھی بھی ساتھ ساتھ نہیں چل سکتے یقینا بھارتی وزیر خارجہ پاکستان کے خیر سگالی جذبات کی بھی عینی شاہد ہیں جن کا مظاہرہ اس نے بھارتی وزیر اعظم نریندر مودی کی حلف برادری کے موقع پر کیا تھا اس موقع پر دونوں وزرائے اعظم کی گرمجوشی اور ان کے بامعنی مذاکرات نے دونوں ملکوں کے عوام کو یہ پیغام دیا تھا کہ جس کشیدگی نے ہمیشہ ان کی خوشحالی کو یرغمال بنائے رکھا اب اس کے چھٹنے کے دن آچکے ہیں خطے کے امن اور دونوں ملکوں کے عوام کے خوشحال مستقبل کا یہ تقاضا ہے کہ وہ تصفیہ طلب امور بات چیت کے ذریعے حل کریں اور مختلف شعبوں میں باہمی تعاون کو زیادہ سے زیادہ وسعت دیں یہ امر اطمینان بخش ہے کہ پاکستان اور بھارت کی دونوں حکومتیں باہمی تعلقات کے ایک نئے دور کے آغاز پر متفق ہیں اور خارجہ سیکرٹریوں کی مجوزہ ملاقات بھی  اسی سلسلے کی ایک کڑی ہے اس تناظر میں یہ لازم ہے کہ ماضی کے تلخ واقعات کو یکسر فراموش کرکے نئے عزم کے ساتھ تعلقات کے نئے سفر کا آغاز کیا جائے دونوں ملکوں کے درمیان باہمی تجارت کو فروغ دینے کے سلسلہ میں بہت ساکام مکمل کیا جاچکا ہے جبکہ آمدرفت کو وسعت دینے کے سلسلے میں ویزوں کے اجراء کی پالیسی بھی خاصیسہل کی جاچکی ہے اور کامیابیوں کو موثر اور نتیجہ خیز بنانے کیلئے دو طرفہ مذاکرات اور رابطوں میں تیزی اور وسعت نہ صرف خطے بلکہ دونوں ملکوں کے بہترین مفاد میں ہے۔