مسئلہ کشمیر پراقوام متحدہ کاخصوصی نمائندہ مقرر کرنے کی تجویز

مسئلہ کشمیر کے حل کے سلسلے میں برطانوی ارکان پارلیمنٹ کی سفارتی کوششیں لائق تحسین ہیں ان کوششوں کے نتیجے میں جہاں مسئلہ کے حل کے سلسلے میں بھارت پر عالمی دبائو میں اضافہ ہو رہاہے وہاں اس کے اس بے بنیاد اور مضحکہ خیز موقف کی بھی سختی سے نفی ہو رہی ہے جس کے تحت وہ گاہے گاہے کشمیر کے اٹوٹ انگ ہونے کی رٹ لگاتاتھا برطانوی پارلیمنٹ کے پندرہ سے زائد ارکان نے اپنے دستخطوں سے اقوام متحدہ کے سیکرٹری جنرل کو ایک خط ارسال کیاہے جس میں انہیں مسئلہ کشمیر پر اقوام متحدہ کا خصوصی نمائندہ مقرر کرنے کی تجویز دی ہے خط میں یہ بھی کہاگیاہے کہ اقوام متحدہ کے سابق سیکرٹری جنرل کوفی عنان یا جنوبی افریقہ کے سابق صدر بشپ ڈسمیل ٹوٹو کو اقوام متحدہ کا خصوصی نمائندہ برائے امور کشمیر مقرر کیاجاسکتاہے خط میں اقوام متحدہ سے کہاگیاہے کہ وہ مسئلہ کشمیر حل کرانے کے سلسلے میں ثالثی کا کردار اداکرے خط میں کہاگیاہے کہ جنوبی ایشیاء کے امن استحکام اور خوشحالی کے لئے مسئلہ کشمیر کا حل کیاجانا ضروری ہے یہ امر قابل ذکر ہے کہ برطانوی ارکان پارلیمنٹ نے اس سے قبل بھی اقوام متحدہ کو مسئلہ کشمیر کے حل کے سلسلے میں اس کے کردار کی طرف متوجہ کیاہے تاریخی صداقت تو یہ ہے کہ کشمیریوں کے حق خودارادیت کے معاملے میں اقوام متحدہ کی قراردادیں ہنوز حل طلب ہیں اور اقوام متحدہ کے ایجنڈے پر موجود ہیں اگر اقوام متحدہ بعض طاقتوں کی عدم دلچسپی یا بعض فنی نکات کے باعث ان قراردادوں پر عمل نہیں کرواسکتی تو کم ازکم مسئلہ کے حل کے سلسلے میں ثالثی کی کوششیں تو کرسکتی ہے اس ضمن میں ارکان پارلیمنٹ کی یہ تجویز غیر معمولی اہمیت کی حامل ہے جس میں اقوام متحدہ کے سیکرٹری کو مسئلہ کشمیر کے بارے میں اپنا خصوصی نمائندہ مقررکرنے کے لئے کہاگیاہے اقوام متحدہ کا خصوصی نمائندہ مقرر ہونے سے جہاں پاکستان اور بھارت کے درمیان مسئلہ کشمیر پر بالواسطہ اور براہ راست مذاکرات کو مددمل سکتی ہے وہاں اقوام متحدہ کے نمائندے مقبوضہ کشمیر میں انسانی حقوق کی خلاف ورزیوں کی روک تھام میں بھی اہم کردار ادا کر سکتے ہیں برطانوی ارکان پارلیمنٹ کا اقوام متحدہ کے سیکرٹری جنرل کو خط خطے میں امن واستحکام اور خوشحالی کے تناظر میں غیر معمولی اہمیت کا حامل ہے اب عالمی ادارے کے سربراہ پر ذمے داری عائد ہوتی ہے کہ وہ عالمی برادری کے اہم ملک کے منتخب نمائندوں کی تجاویز پر بلاتاخیر عمل درآمد کو یقینی بنائیں جس مسئلہ پر اقوام متحدہ نے قراردادیں تک منظور کر رکھی ہیں اس کے بارے میں اسے کچھ تو اپنی ذمے داریاں پوری کرنی چاہیں۔