Get Adobe Flash player

08 September 2017

آرمی چیف نے چار دہشت گردوں کی سزائے موت کی توثیق کردی، آئی ایس پی آر

آئی ایس پی آر کے مطابق سربراہ پاک فوج جنرل قمر جاوید باجوہ نے کالعدم تنظیموں کے 4 دہشت گردوں کی سزائے موت کی توثیق کردی ہے۔پاک فوج کے شعبہ تعلقات عامہ (آئی ایس پی آر)کے مطابق آرمی چیف جنرل قمرجاوید باجوہ نے 4 اہم دہشت گردوں کی سزائے موت کی توثیق کردی ہے۔ موت کی سزا پانے والے دہشت گردوں میں ریاض احمد، حفیظ الرحمان، محمد سلیم اور کفایت اللہ شامل ہیں اور چاروں کا تعلق کالعدم تنظیموں سے ہے۔آئی ایس پی آر کے مطابق دہشت گرد مسلح افواج، قانون نافذ کرنے والے اداروں اور معصوم شہریوں کے قتل میں ملوث ہیں اور مجموعی طور پر  16 افراد کو قتل جب کہ 8 افراد کو زخمی کیا، چاروں دہشت گردوں سے اسلحہ بھی برآمد ہوا ہے اور انہوں نے فوجی عدالتوں کے سامنے اپنے جرائم کا اعتراف کیا جس پر فوجی عدالتوں نے انہیں کو سزائے موت کا حکم دیا جب کہ  مزید 23 مجرموں کو مختلف مدت کی قید کی سزائیں بھی سنائی گئی ہیں۔

Read more

آرمی چیف کی زیر صدارت کور کمانڈرز کانفرنس میں ملکی سلامتی کی صورتحال پر غور

آرمی چیف جنرل قمر جاوید باجوہ کی زیر صدارت 204ویں کور کمانڈرز کانفرنس ہوئی جس میں ملکی سلامتی کی صورتحال پر غور کیا گیا۔پاک فوج کے شعبہ تعلقات عامہ(آئی ایس پی آر) کے مطابق آرمی چیف جنرل قمر جاوید باجوہ کی زیر صدارت جی ایچ کیو میں 204 ویں کور کمانڈرز کانفرنس ہوئی جس میں ملک کی اندرونی و بیرونی سلامتی کی صورتحال کا جائزہ لیاگیا۔آئی ایس پی آر کے مطابق کور کمانڈرز کانفرنس میں آپریشن رد الفساد میں پیشرفت کا بھی جائزہ لیاگیا۔

Read more

ملکی سلامتی کے لیے قربانی دینے سے پیچھے نہیں ہٹیں گے، ڈی جی رینجرز سندھ

ڈی جی رینجرز سندھ میجرجنرل محمد سعید نے کہا کہ ملکی سلامتی کے لیے قربانی دینے سے پیچھے نہیں ہٹیں گے.ترجمان سندھ رینجرزکے جاری کردہ بیان کے مطابق یوم شہدا کے موقع پرشہدا ٹریننگ سینٹر اینڈ اسکول میں پروقار تقریب کا اہتمام کیا گیا، تقریب کے دوران رینجرز پبلک اسکول کے طلبا نے شہدا کوخراج عقیدت پیش کرتے ہوئے ملی نغمے اورٹیبلو پیش کئے اس کے علاوہ ملک کے لیے جانوں کا نذرانہ پیش کرنے والے بہادرسپوتوں کی زندگی اورشہادت کودستاویزی فلم کی شکل میں بھی پیش کیا گیا، اس موقع پرڈی جی رینجرز میجرجنرل محمد سعید نے یادگار شہدا پر پھولوں کی چادرچڑھائی اورفاتحہ خوانی کی۔تقریب سے خطاب کرتے ہوئے میجرجنرل محمد سعید نے کہا کہ یوم شہدا کی روایت ہرآنے والے سال کے ساتھ جذبوں کو تقویت دے رہی ہے، تقریب میں پاکستان کے ہرگوشے سے آنے والے شہدا کے ورثا شریک ہیں، رینجرز وہ منفرد فورس ہے جس نے چارسال کی قلیل مدت میں اپنی اعلی صلاحیتوں کی بدولت دہشت گردی کے تدارک کے ساتھ قیام امن کو بھی یقینی بنایا، ان کامیابیوں کا سہرا شہدا اوران کے ورثا کے سرہے، ہمیں اپنے شہدا اوران کے ورثا پرفخر ہے۔ ملکی سلامتی کیلیے قربانی دینے سے پیچھے نہیں ہٹیں گے۔


Read more

کراچی یونی ورسٹی میں دہشتگردی کا کوئی ونگ نہیں چل رہا، وائس چانسلر

جامعہ کراچی کے وائس چانسلرڈاکٹر اجمل خان کا کہنا ہے کہ طلبا تنظیموں کی بحالی ہونی چاہیے جب کہ جامعہ میں دہشتگردی کا کوئی ونگ نہیں چل رہا۔جامعہ کراچی کے وائس چانسلرڈاکٹر اجمل خان نے پریس کانفرنس میں میڈیا پرچلنے والی خبروں اورطلبا کا دہشت گردی میں ملوث ہونے کے حوالے سے بریفنگ دیتے ہوئے کہا کہ مجھے سیکیورٹی ایجنسیزکی جانب سے کوئی معلومات نہیں دی گئی، میری معلومات کا ذریعہ میڈیا ہے۔  چیئرمین سینٹ کی طلبا تنظیموں کی بحالی کے حوالے سے رائے ذاتی نوعیت پراچھی ہے، سیکیورٹی انتظامات ہمارا نہیں اداروں کا کام ہے تاہم ہم پاکستان کے سیکیورٹی اداروں کے ساتھ کھڑے ہیں اورذاتی طورپرمیرا خیال ہے کہ طلبا تنظیموں کی بحالی ہونی چاہیے۔وائس چانسلرکا کہنا تھا کہ یہ کہنا غلط ہے کہ جامعہ میں دہشت گرد پیدا ہورہے ہیں، ایسا کہہ کرجامعہ کراچی کا نام خراب کرنے کی کوشش کی جارہی ہے، عدم برداشت صرف جامعہ کراچی کا مسئلہ نہیں جب کہ جامعہ میں دہشتگردی کا کوئی ونگ نہیں چل رہا، سیکورٹی ادارے ہمیں بتائیں کہ ہم کس طرح جامعہ کی سیکیورٹی بہتر بنائیں، سیکیورٹی اداروں کو ڈیٹا فراہم کرنیکے حوالے سے ابھی کوئی فیصلہ نہیں ہوا۔

Read more

میانمار میں مسلمانوں اورسندھ میں مہاجروں سے زیادتی کی جارہی ہے، فاروق ستار

ایم کیو ایم پاکستان کے سربراہ فاروق ستار کا کہنا ہے کہ میانمار میں مسلمانوں پر اور سندھ میں مہاجروں سے زیادتی کی جارہی ہے جس کی ہم مذمت کرتے ہیں۔کراچی میں میڈیا سے گفتگو کرتے ہوئے ایم کیو ایم کے سربراہ فاروق ستار کا کہنا تھا کہ برما کے حالات پر ہم نے سخت موقف اور پیغام بھیجا ہے، ہم نے عالمی اداروں سے کہا کہ وہ مداخلت کرکے میانمار کے حالات پر قابو پائیں، ہم نے سینیٹ، قومی اور سندھ اسمبلی میں برما کے حوالے سے قراد داد پیش کی ہیں، ہمیں برما کے ساتھ سفارتی تعلقات پربھی نظرثانی کرنا چاہیے، میانمار میں مسلمانوں اور سندھ میں مہاجروں کے ساتھ زیادتی کی جارہی ہے جس کی ہم مذمت کرتے ہیں۔ایم کیو ایم کے سربراہ کا کہنا تھا کہ 22 اگست 2016 کے واقعات آپ کے سامنے ہیں، مجھ سمیت سینکڑوں نامعلوم افراد کے خلاف ایف ائی آر درج کی گئی تھیں، میری اورعامرخان کی ضمانتوں میں توثیق ہوگئی ہے، عدالتیں خوش اسلوبی کے ساتھ کام کر رہی ہیں، جب کیس کی سماعت آگے بڑھے گی تو ہمارے موقف کی بھی حمایت ہوگئی اور جس دن یہ واقعہ ہوا تھا اسی دن ہم نے ایو کیو ایم لندن سے اظہارلاتعلقی کر دیا تھا۔فاروق ستار کا کہنا تھا کہ پیپلز پارٹی نے ہمیں دہشت گردوں کے رحم و کرم پرچھوڑا ہے تاکہ ہمارے ساتھ کچھ برا اور پیپلز پارٹی والوں کے لئے میدان صاف ہوسکے۔ اے ڈی خواجہ کے حوالے سے ان کا کہنا تھا کہ یہ ایک اچھے افسر ہیں جس پر کرپشن کا کوئی داغ نہیں ، جو حکومت سندھ کے غیر قانونی فیصلوں کو نہیں مانتا اور پوری سندھ حکومت اسے ہٹانے کے لیے مصروف عمل ہے۔


Read more

آنگ سان سوچی روہنگیا مسلمانوں پر ظلم و زیادتی کے سلسلے کو روکیں، پاکستان

پاکستان نے میانمار میں روہنگیا مسلمانوں کے قتل عام کی مذمت کرتے ہوئے برما کی نوبیل انعام یافتہ حکمران آنگ سان سوچی سے مطالبہ کیا ہے کہ وہ فوری طور پر مسلمانوں کے خلاف ظلم و زیادتی کا سلسلہ رکوائیں۔اسلام آباد میں وزیراعظم شاہد خاقان عباسی کی صدارت میں وفاقی کابینہ کا اجلاس ہوا جس میں روہنگیا مسلمانوں کی نسل کشی پر مذمتی قرارداد منظور کی گئی۔ قرارداد میں کہا گیا کہ پاکستان روہنگیا مسلمانوں کے قتل عام کی شدید مذمت کرتا ہے، میانمار میں براہ راست ریاستی اداروں کی سرپرستی میں خواتین و بچوں سمیت بے گناہ روہنگیا مسلمانوں کو بے رحمی سے قتل کیا جا رہا ہے۔قرارداد میں یہ بھی کہا گیا کہ نہتے شہریوں کے خلاف سفاکانہ اقدامات نہ صرف ریاستی دہشت گردی کے مترادف ہیں بلکہ دنیا بھر کی قوموں اور برادریوں کے ضمیر پر بھی سوالیہ نشان ہیں۔ قرارداد میں نوبیل انعام یافتہ آنگ سان سوچی سے مطالبہ کیا گیا کہ وہ میانمار میں ہونے والے ظلم و زیادتیوں کے سلسلے کو فوری طور پر رکوائیں کیوں کہ ملک میں ان کی سیاسی جماعت کی حکومت ہے۔ علاوہ ازیں اقوام متحدہ سے بھی مطالبہ کیا گیا کہ وہ روہنگیا مسلمانوں کے قتل عام کو روکنے کے لیے آگے بڑھ کر ٹھوس اقدامات کرے۔


Read more